काभ्रे– नेकपा एमालेमा झन्डै ३५ वर्षदेखि क्रियाशील युवा नेता जितराम लामाले एमाले पार्टी परित्याग गरेपछि काभ्रेपलाञ्चोकको स्थानीय राजनीतिमा हलचल भएको छ । एमाले काभ्रेका प्रभावशाली युवा नेता लामाले बिहिवार पार्टी परित्यागको घोषणा गरेका थिए ।
लामाले आफ्नो आधिकारिक फेसबुक पेजमार्फत एक भावनात्मक स्टाटस लेख्दै एमालेसँगको लामो राजनीतिक सम्बन्ध टुङ्ग्याएको घोषणा गरेका हुन् । उनले लेखेका छन्, “मैले अनेरास्ववियु, प्ररायुसंघदेखि पार्टीका गाउँ, जिल्ला र केन्द्रीय तहमा काम गर्ने अवसर पाएँ । तर पछिल्लो समय पार्टीभित्र आन्तरिक लोकतन्त्र कमजोर हुँदै गयो, स्वेच्छाचारिता बढ्यो र नेतृत्वले युवा पुस्ताको भावना बुझ्न सकेन ।”
लामाले थप लेखेका छन्, “जेनजी आन्दोलनसहितको नयाँ राजनीतिक चेतनालाई एमालेले आत्मसात गर्न नसकेको स्पष्ट भएको छ । त्यसैले अब म ‘उज्यालो नेपाल पार्टी’ नामक नयाँ राजनीतिक शक्तिसँग सहयात्रा गर्ने निर्णयमा पुगेको छु ।”
उनले जनताको सेवा, सुशासन र राष्ट्रको विकासका लागि नयाँ ढङ्गको राजनीति आवश्यक रहेको भन्दै जनसमर्थनका लागि पनि अपील गरेका छन् । लामा २०७९ सालको स्थानीय तह निर्वाचनमा चौरीदेउराली गाउँपालिकाको अध्यक्षमा झिनो मतान्तरले पराजित भएका थिए । सो निर्वाचनपछि पनि उनले लगातार एमालेभित्र सुधार र युवाको आवाजका पक्षमा बोल्दै आएका थिए ।
लामाको पार्टी परित्यागलाई स्थानीय नेताहरूले “एमालेभित्रको असन्तुष्टि र नेतृत्वप्रतिको मोहभङ्गको परिणाम” भएको संज्ञा दिएका छन् । अब उनी कुन भूमिकामा र कस्तो प्रभावसहित नयाँ पार्टीमा देखिने हुन् भन्ने चासो काभ्रेको राजनीतिक वृत्तमा चासोको विषय बनेको छ ।
