काभ्रे । काभ्रेको चौरिदेउराली गाउँपालिका-२ स्थित खाँडादेबी माध्यमिक विद्यालयका विद्यार्थीहरूलाई परम्परागत दुना-टपरी बुन्ने सीप सिकाइएको छ। विद्यालयको वार्षिक शैक्षिक क्यालेण्डर अनुसार नियमित शुक्रबार सञ्चालन हुने अतिरिक्त क्रियाकलाप अन्तर्गत विद्यार्थीहरूलाई दुना-टपरी बुन्ने तथा क्ले (माटो) बाट कलात्मक सामग्री निर्माण गर्ने अभ्यास गराइएको हो।
कार्यक्रमका क्रममा विद्यार्थीहरूलाई सालको पात टिप्ने, सफा गर्ने र सामूहिक रूपमा दुना तथा टपरी बुन्ने प्रक्रिया सिकाइएको थियो। आधुनिक शिक्षासँगै स्थानीय सीप, संस्कृति र परम्पराको संरक्षण तथा प्रवर्द्धन गर्ने उद्देश्यले यस्तो गतिविधि सञ्चालन गरिएको विद्यालयले जनाएको छ।
विद्यालयका शिक्षक अर्पण मोक्तान तामाङका अनुसार किताबी ज्ञानमा मात्र सीमित नराखी विद्यार्थीहरूलाई व्यवहारिक र जीवनोपयोगी सीप प्रदान गर्ने लक्ष्यका साथ कार्यक्रम आयोजना गरिएको हो। “दुना-टपरी जस्ता परम्परागत सामग्री हाम्रो मौलिक पहिचान हुन्। यसले सीप विकाससँगै आत्मनिर्भरता र श्रमप्रतिको सम्मान पनि सिकाउँछ,”उहाँलेभन्नुभयो।
।
कार्यक्रममा सहभागी विद्यार्थीहरूले नयाँ सीप सिक्न पाउँदा उत्साहित भएको प्रतिक्रिया दिएका छन्। उनीहरूले यस्तो व्यवहारिक शिक्षा नियमित रूपमा भए पढाइ अझ रोचक र उपयोगी हुने बताएका छन्।
विद्यालय प्रशासनका अनुसार आगामी दिनमा पनि कृषि, हस्तकला, स्थानीय संस्कृति र वातावरण संरक्षणसँग सम्बन्धित विभिन्न व्यवहारिक गतिविधिहरू सञ्चालन गर्दै विद्यार्थीहरूको सर्वांगीण विकासमा जोड दिइनेछ।
