एमालेलाई नै भोट किन ?
४७ सालदेखि देश लुट्दा पनि
अझै नपुगेको जस्तो देखिन,
जनताको पसिनाबाट
सत्ता र सम्पत्ति दुबै चुसिरहन।
एमालेलाई नै भोट किन ?
मदन भण्डारीको हत्यारा खोज्ने नाटक गर्दै
सत्यलाई फाइलभित्र गाडिरहन,
प्रशासन र अदालत कब्जा गरी
न्यायलाई पार्टी कार्यालयमा थुन्न।
एमालेलाई नै भोट किन ?
भ्रष्ट, दलाल, बिचौलिया र माफियालाई
राज्यकै छातामुनि हुर्काउन,
सर्बहारा जीवनको शपथ खाएर
नवधनाड्य वर्गको राजकुमार बन्न।
एमालेलाई नै भोट किन ?
मार्क्सवाद-लेनिनवादलाई
भित्तामा झुन्ड्याइने पुराण बनाउन,
गिरीबन्धु टी-स्टेटलाई
कानुनी जामा पहिर्याएर बचाउन।
एमालेलाई नै भोट किन ?
ललिता निवासको जग्गा
फेरि-फेरि निगल्न,
भुटानी शरणार्थीको पीडामाथि
कमिसनको व्यापार चलाउन।
एमालेलाई नै भोट किन ?
कार्यकर्तालाई अरबौंको ठेक्का बाँड्न,
भूमाफिया, शैक्षिक माफिया
र मेडिकल माफियालाई
राष्ट्रिय विकासको साझेदार घोषणा गर्न।
एमालेलाई नै भोट किन ?
उपचारको नाममा करोडौं झ्वाम पार्न,
महाकाली सन्धीजस्ता
राष्ट्रघाती दस्तावेज
इतिहास दोहोर्याउन।
एमालेलाई नै भोट किन ?
एनजिओ-आइएनजिओको बोर्डमा
देशको स्वाभिमान टाँस्न,
ॐनी, यति, वाइडबडी, जलहरी काण्डलाई
‘सामान्य प्रक्रिया’ भन्न।
एमालेलाई नै भोट किन ?
प्रतिष्ठानको नाममा
अरबौंको खेल चलाउन,
निरंकुश, तानाशाही शासनलाई
‘स्थायित्व’ भनेर बेच्न।
एमालेलाई नै भोट किन ?
जेन-जी विद्रोहमा
ढलेका केटाकेटीको रगतलाई
राजनीतिक सिँढी बनाउन,
र फेरि निर्लज्जसाथ सोध्न,
“विकल्प छ र ?”
हो,
त्यसैले एमालेलाई नै भोट किन ?
किनकि
सत्यभन्दा सत्ता प्यारो छ,
जनताभन्दा कुर्सी ठूलो छ,
र
लाजभन्दा लोभ बलियो छ।
